Det fyrste Bjønnarennet gjekk av stabelen i 1967. Rennet hadde 95 deltakarar. Langrennet vart arrangert i same området som i dag. Men alt frå fyrste året var også hopprennet ein viktig del av arrangementet. Det blei arrangert i Fossøybakken som tålte hopp på både 50 og 60 m. Dei fyrste åra var rennet fyrst og fremst for dei som var bra trena og som sette konkurransemomentet høgt.

Desse åra hadde me då også fleire av dei mest kjende skiløparane i landet på startlista. Det er nok å nemne Ole Ellefseter, Erling Steineide, Eilef og Pål Gunnar Mikkelsplass. I hoppbakken deltok kjendisar som Ingolf Mork,Jan Olav Roaldseth, Torbjørn Yggeseth, Arne Larsen og Arne Bystøl.

I 1978 vart trimklassen innført. Den vart med ein gong svært populær for skiløparar i alle aldrar (og alle vektklassar!) og gjorde sitt til at me nådde ein topp i 1983 med heile 944 deltakarar.Etter kvart som interessa for hoppsporten gjekk nedover vart det færre og færre som stilte opp i Fossøybakken. Hopp var difor i 1989 for (førebels) siste gong ein del av Bjønnarennet.

Det særmerkte med Bjønnarennet har i alle år vore dei flotte premiane som byggjer på lokal husflid;i mange heimar i landet står ei rype,eit rosemåla fat eller ein veven løpar som prov på innsatsen i Bjønnarennet.Denne tradisjonen har me som målsetjing å ta vare på. Men me kan ikkje leve på tradisjonar åleine.

Til liks med mange andre utandørsarrangement gjekk deltakartalet på slutten av 80-talet nedover. Denne trenden heldt fram inn i 90 -talet. I 1998 innførde me difor "Bjønnasporet" der ein må konkurrere mot ei maksimaltid etter mønster frå Birkebeinerrennet.

Ein viktig del av Bjønnarennet har i alle år vore den tradisjonelle Bjønnafesten. I mange år var dette eit stort arrangement med underhaldning og premieutdeling.
Dei siste åra har me valt å dele ut premiane rett etter at rennet er slutt. Bjønnafesten har difor hatt eit noko mindre omfang, men gjennom godt samarbeid med Pyramiden Senterkafé og lokale kulturkrefter trur me at Bjønnafesten framleis vil vere eit verdig punktum for ein flott Skjærtorsdag.